Ukwezi k’uburere: Ababyeyi basabwe kwimakaza uburere buboneye mu muryango

Mu bikorwa byahariwe ukwezi k’uburere, ababyeyi basabwe gushyira imbaraga mu kwita ku burere bw’abana hagamijwe kubarinda icyo ari cyo yose cyatuma bajya mu ngeso mbi nk’ubuzererezi n’ibindi bikorwa bibangamira umuryango nyarwanda.

Ibi byagarutsweho mu nama yahuje inzego zitandukanye n'ababyeyi bafite abana bagiye mu buzererezi/mu muhanda (abakiriyo n'abakuweyo) mu rwego rwo kuganira ku ngamba zo kurandura impamvu zitera abana kuva mu miryango bakajya mu buzererezi.

Iyi nama yabereye mu Karere ka Gasabo ku wa 11 Kamena 2026 iyobowe na Minisitiri w’Uburinganire n’Iterambere ry’Umuryango, Uwimana Consolee yitabiriwe n'abayobozi b'inzego zinyuranye barimo Umuyobozi Mukuru Wungirije wa Polisi ushinzwe Ibikorwa, CP Vincent Sano; abayobozi b’Ikigo cy’Igihugu Gishinzwe Imikurire no Kurengera Umwana (NCDA), Umuyobozi Mukuru wungirije w’Ikigo gishinzwe Igororamuco (NRS), abafatanyabikorwa, inshuti z'umuryango n'ababyeyi.

Umuyobozi Mukuru wa NCDA, Ingabire Assumpta yagarutse ku mpamvu zitera abana kujya mu buzererezi zirimo amakimbirane mu miryango, ubusinzi, ababyeyi bashaka bafite abana maze abo ntibitabweho kimwe n’abavutse nyuma.

Minisitiri Consolee yavuze ko ibiganiro nk'ibi ari umwanya mwiza ku babyeyi wo kuzirikana ku Rwanda bifuza gusigira abana no kwibaza uburere babaha. Ati " iyo tuvuga umwana, tuba tuvuga ejo hazaza h’Igihugu cyacu".

Minisitiri yavuze ko umuryango utekanye ari ubasha kwibeshaho, abawugize bafite ubuzima bwiza, abana bose biga, utarangwamo amakimbirane, kandi abana bishimira kuwubamo kuko bafite ababyeyi babatega amatwi kandi bumva ibibazo byabo.

Umuyobozi Mukuru wa Police Wungirije ushinzwe Ibikorwa, CP Vincent Sano yavuze ko n'ubwo Leta yashyize imbaraga mu gukemura ibibazo bibangamiye abana, hari abakiri mu buzererezi, asaba ababyeyi kubakurikirana bakajyanwa mu ishuri.

Ibi biganiro byateguwe mu rwego rw’ibikorwa byahariwe ukwezi k’uburere ku nsanganyamatsiko igira iti “Ndera Neza, Nkure Nemye”.

Muri uko kwezi kandi hakozwe ibikorwa by’ubukangurambaga ku burere buboneye birimo ibiganiro kuri radio Rwanda muri gahunda ya RBA Hafi Yawe byabereye mu turere twa Musanze na Kirehe, kwizihiza umunsi w’umwana w’umunyafurika, kwizihiza umunsi wahariwe imbonezamikurire y’abana bato (ECD) wabereye mu Karere ka Gatsibo na siporo rusange yabereye mu Karere ka Rwamagana.